BE.193 Logu no.193
MARIBAK LANGIT

Ayat 1
Maribak langit ni langitan Dibahen holong ni rohaM
Di hami angka na hansitan Papatar denggan ni basaM
Diida nasa manisia Pangisi ni portibi on
Ro Ho, o Jesus na badia, Humophop hajomaon on.

Ayat 2
Diporsan Ho do nasa dosa Ni manisia sasude
I ma umbaen marutang hosa Ho,manggarari i sude
Ditaoni Ho do hamatean Di hau na pinarsilang i
Pamasuk hamion, manean Na uli na di surgo i.

Ayat 3
Mauliate ma rohangku Di Ho, o Jesus Tuhanki
Naung sae do saluhut dosangku Binaen ni hamamateMi
Malua sian hamagoan Do au binaen ni asiMi
Hupuji goarMi, o Tuhan Saleleng ni lelengna i.

Ayat 4
Antong Ho ma nampuna ahu Saleleng au di tano on
Denggan ma au marpangalaho Pasangap goarMi tongtong
Sai tiruonku ma pambaenMu Mangkaholongi dongan i
Seahononku ma diringku Maniru Ho, o Tuhanki.
